Mynegai Prisiau Tai y DU

Defnyddiwch y teclyn chwilio i weld tueddiadau prisiau tai yn y DU:

chwilio mynegai prisiau tai y DU

Mynegai cyfredol

Am y Mynegai Prisiau Tai

Mae Mynegai Prisiau Tai y DU yn defnyddio data gwerthiannau tai o Gofrestrfa Tir EM, Cofrestri’r Alban, a Gwasanaethau Tir ac Eiddo Gogledd Iwerddon ac fe’i cyfrifir gan y Swyddfa Ystadegau Gwladol. Mae’r mynegai’n defnyddio dull ystadegol, a elwir yn fodel atchweliad hedonig, ar gyfer y ffynonellau data amrywiol ar brisiau a nodweddion eiddo i gynhyrchu amcangyfrifon o’r newid yn y prisiau tai ar gyfer pob cyfnod.

Adolygwyd yr ystadegau swyddogol achrededig hyn yn annibynnol gan y Swyddfa Rheoleiddio Ystadegau ym Medi 2018. Maent yn cydymffurfio â’r safonau dibynadwyaeth, ansawdd a gwerth yn y Cod Ymarfer ar gyfer Ystadegau a dylid eu labelu’n ‘ystadegau swyddogol achrededig’.

Cyhoeddir y mynegai bob mis, gyda ffigurau Gogledd Iwerddon yn cael eu diweddaru bob chwarter.

Cynghorir y gall nifer isel o drafodion gwerthu mewn rhai awdurdodau lleol arwain at anwadalrwydd yn yr amcangyfrifon ar y lefelau hyn. Dylid dadansoddi ardaloedd daearyddol gyda nifer isel o drafodion gwerthu yng nghyd-destun eu tueddiadau mwy hirdymor yn hytrach na chanolbwyntio ar symudiadau misol. Ceir rhagor o fanylion ar ein tudalen cyfarwyddyd am ein data a’u hansawdd.

Mae data hanesyddol o fewn y teclyn hwn yn ddata deilliedig. O dan Fynegai Prisiau Tai y DU, mae data ar gael o 1995 ar gyfer Cymru a Lloegr, o 2004 ar gyfer yr Alban ac o 2005 ar gyfer Gogledd Iwerddon. Mae ôl-gyfres hirach wedi deillio trwy ddefnyddio llwybr hanesyddol Mynegai Prisiau Tai y Swyddfa Ystadegau Gwladol i lunio cyfres sy’n mynd yn ôl i 1968.

Cymorth a chefnogaeth

Ceir canllaw defnyddwyr ar gyfer y gwasanaeth hwn, a gallwch ddarllen rhagor am ddata cysylltiedig â Mynegai Prisiau Tai y DU. I gael rhagor o gymorth, anfonwch ebost atom.

Lawrlwytho Data’r Mynegai Prisiau Tai

Gan ddefnyddio’r teclyn chwilio gallwch nodi is-set benodol o ddata mynegai prisiau tai sydd o ddiddordeb ichi, ac yna ei lawrlwytho. Os hoffech lawrlwytho holl ddata Mynegai Prisiau Tai y DU ar ffurf wedi ei gwahanu ag atalnod, gweler tudalen adroddiadau Mynegai Prisiau Tai y DU.

Data Cysylltiedig Mynegai Prisiau Tai y DU

Rydym yn cyhoeddi’r data hwn ar ffurf data cysylltiedig, gan anelu at radd pum seren.

I roi cynnig ar eich ymholiadau eich hunain yn erbyn ein cyhoeddiadau data cysylltiedig, defnyddiwch y ffurflen ymholiad SPARQL. Mae rhai ymholiadau enghreifftiol wedi eu cynnwys gyda’r ffurflen, a gallwch gynhyrchu allbwn mewn amrywiaeth o ffurfiau gwahanol.

Os hoffech weld, a rhedeg, yr ymholiad SPARQL a ddefnyddir i gynhyrchu’r adroddiad a grëwyd yn y teclyn chwilio, defnyddiwch y botwm dangos ymholiad SPARQL.

Newidiadau i wasanaethau a data

I gael manylion am newidiadau i'r gwasanaeth neu newidiadau i'r data, gweler y log newid.

Pan fydd ffiniau awdurdodau lleol yn newid, yn uno, yn rhannu neu’n cael eu hailenwi, caiff cyfres Mynegai Prisiau Tai y DU ei diweddaru i adlewyrchu’r ddaearyddiaeth newydd. Caiff data hanesyddol ei ddiwygio fel bod ffigurau’n cael eu cyflwyno ar sail awdurdod lleol gyson dros amser.

Mae hyn yn golygu bod:

• Data cyfres amser yn parhau’n gymaradwy ar draws blynyddoedd.
• Defnyddir yr un ddaearyddiaeth awdurdod lleol trwy’r gyfres gyhoeddedig.
• Nid oes angen i ddefnyddwyr addasu â llaw ar gyfer newidiadau ffiniau hanesyddol.

Os caiff awdurdod lleol ei greu neu ei ad-drefnu, bydd data cyhoeddedig Mynegai Prisiau Tai y DU yn adlewyrchu’r strwythur wedi ei ddiweddaru hwnnw ar draws y gyfres amser lawn.

Mae hyn yn bwysig oherwydd os ydych yn dadansoddi tueddiadau hirdymor ar gyfer awdurdod lleol, mae set ddata Mynegai Prisiau Tai y DU yn darparu cyfres ystadegol gyson sy’n cyfateb â ffiniau presennol awdurdodau lleol.

I gael rhagor o wybodaeth am y newidiadau ffiniau hanesyddol, gweler y tudalennau Ein daearyddiaeth newidiol gan y Swyddfa Ystadegau Gwladol.

Cysylltau i ddata arall

Darperir cysylltau i ffynonellau eraill o ddata agored o dan y Drwydded Llywodraeth Agored (ONS) a’r Drwydded Data Agored (OS). Nid yw Cofrestrfa Tir EF yn gyfrifol am gynnwys neu ddibynadwyedd unrhyw wefannau cysylltiedig.

Manylion cysylltu

Ebost data.services@mail.landregistry.gov.uk
Ffôn 0300 006 0478
Ffurflen gysylltu